index introductio imagines || partitura exemplar translatio

bibliographia e-mail

CTH 414.1

Exemplar --

Citatio: S. Görke (ed.), hethiter.net/: CTH 414.1 (Expl. --, 11.06.2015)

§1

1 -- [mān=za LUGAL=uš É.GAL-LAM kuwapikki] wetezzi

2 -- [mān=ašta suḫḫanzi GI]Š-ruaz

3 -- [nu kī uddār memiyanzi]

4 -- [kuit É.GA]L wedāsi

5 -- [apēdani DUTU-un D]IM-ann=a āraiēr

§2

6 -- [mān=wa É.GAL-LAM wetumm]anzi zinniši

7 -- [mān=wa=za É-ir andurza ḫāni]šši

8 -- nu MU.KAMḪI.A GÍD.DA [ḫāniš āššu ḫāni]š

9 -- araḫza=ma [mān ḫānišši]

10 -- [nu n]aḫšarattan ḫāniš [išḫaššarwāt]ar ḫāniš

§3

11 -- [nu LUGAL-u]š GIŠDAG-ti tezzi

12 -- eḫu pāiwani

13 -- [zigg]=a ḪUR.SAGMEŠ-aš EGIR-an tīya

14 -- LÚ-aš=miš [l]ē kišta

15 -- gāinaš=miš lē kišta

16 -- araš=miš arāš=miš ēš

§4

17 -- eḫu ḪUR.SAG-ri pāiwāni

18 -- nu=tta LUGAL-uš zapziki piḫḫi

19 -- nu=za=kan zapzikit eduwāni

20 -- zik ḪUR.SAG-andan paḫḫaššanut

§5

21 -- LUGAL-i=ma=mu DINGIRMEŠ DUTU-uš DIM-ašš=a udnē É-ir=mitt=a maniyaḫḫir

22 -- nu=za LUGAL-ušš=a udne=met É-ir=mitt=a paḫḫašmi

23 -- zik ammel É-na lē uwaši

24 -- ug=a tuēl parna UL uwāmi

§6

25 -- LUGAL-e=mu DINGIRMEŠ mekkuš MU.KAMḪI.A-uš maniyaḫḫir

26 -- wettann=a kutreš=met NU.GÁL

§7

27 -- LUGAL-ue=mu maniyaḫḫaen GIŠḫulugannien GIŠDAG-iz arunaza udaš

28 -- annaš=maš KUR-e ḫēšer

29 -- nu=mu=za LUGAL-un labarnan ḫalzīēr

§8

30 -- nu EGIR-pa addaš=man DU-an walluškimi

31 -- nu GIŠḪI.A LUGAL-uš DU-ni wēkzi

32 -- ḫēyauēš kuit tašnuškir šallanuškir

§9

33 -- nepišaš kattan uliliškiddumat

34 -- UR.MAḪ-aš kattan šeškit

35 -- UG.TUR-aš=(š)maš6 kattan šeškit

36 -- ḫartaggaš=ma=šmaš šarā arkiškitta

37 -- nu=šmaš=za DU addaš=miš parā idālu zikkit

§10

38 -- [G]U4ḪI.A-uš=ma=šmaš kattan wešittat

39 -- UDUḪI.A-uš=šmaš [ka]ttan wešeyatta

40 -- kinuna=šmaš=za LUGAL-uš l[aba]rnaš ulanun

41 -- nu GIŠDAG-an aram=man ḫalziḫḫu[n]

§11

42 -- UL=wa LUGAL-waš araš=miš zik

43 -- nu=wa=mu ini GIŠ-ru maniyaḫ

44 -- n=at=kan karašmi

45 -- DDAG-iz=ma EGIR-pa LUGAL-i tezzi

46 -- karašš=at=kan karaš

47 -- DUTU-ušš=at=ta DIM-tašš=a maniyaḫḫir

§12

48 -- kinun=a=kan kēz KUR-eaz šarā ītten

49 -- DU-a=šmaš LUGAL-i maniaḫta7

50 -- nu=šmaš=šan šarā KIN-ti tianzi

51 -- šumašš=a šer ḫūinuzzi

52 -- nu=šmaš=an šarā ḫūkkiškanzi8

§13

53 -- kuit=ma=šmaš=kan kardi=šmi anda

54 -- n=at uššitten

55 -- takku ḫazziyaššar

56 -- n=at udatten

57 -- takku idāluš [ … ]-uēš

58 -- n=at uššetten

59 -- takku ḫurtaš

60 -- n=at uššiyatten

§14

61 -- takku ilaš kardi=šmi

62 -- naššuma DUTU-waš ištarningaiš kardi=šmi

63 -- n=at=kan šarā [š]āḫten

64 -- nu=šmaš=kan uizzi

65 -- LUGAL -uš labarnaš kardi=šmi AN.NA AN.BAR=ya [ … -]ḫai

§15

66 -- mān=ma LUGAL andan parna uizzi

67 -- nu GIŠDAG-iz TI8MUŠEN-an ḫalzāi

68 -- eḫu=ta aruna pēimi

69 -- mān pāiši=ma

70 -- nu uliliya GIŠTIR-na šūwaya

71 -- kuiēš ašanzi

§16

72 -- apāšš=a EGIR-pa tezzi

73 -- šuwayaūn=wa

74 -- nu=wa DIšduštayaš DPapayaš katterreš karūeliēš DINGIRMEŠ kūšeš ḫālianteš ašanzi

§17

75 -- EGIR-pa=ma tezzi

76 -- nu kuit iššanzi

77 -- apaš=a=šši EGIR-pa tezzi

78 -- GIŠḫūlali ḫarzi

79 -- GIŠḫūšuš šūwaduš ḫarkanzi

§18

80 -- nu LUGAL-waš MU.KAMḪI.A-uš malkiyanzi

81 -- wettann=a kutreš=šmit kappūwauwar=šamet UL duqqāri

§19

82 -- GIŠDAG-iz LUGAL-i tezzi

83 -- ḫuitti=wa namma=ma DUMU.DUMUMEŠ=ŠU LUGAL-waš parna luttiya

§20

84 -- MUNUS.MEŠUŠ.BAR ulkiššaruš LÚ.MEŠBAR.DUL8

85 -- apēdaš peran zapzaki dāi

86 -- nu GIŠPÈŠ šuḫḫāi

87 -- apēdašš=a peran kēnupi dāi

88 -- nu GIŠGEŠTIN ḪÁD.DU.A GIŠḫašigga=ya šuḫḫai

89 -- LUGAL-un=wa liliškitten

§21

90 -- šākuwa=ššet lileškitten

91 -- irman=ši=kan datten

92 -- weritman=ši=kan datten

93 -- ḫurnapišta=šši=kan datten

94 -- ḫaraššanaš GIG-an dātten

95 -- antuḫšaš idālu INIMMEŠ-ar datten

96 -- kattawātar datten

97 -- g[in]uwaš GIG-an datten

98 -- ŠÀ-aš GIG-an datten

§22

99 -- tīya šalliš MUL-aš

100 -- nu ḪUR.SAGMEŠ-uš pedi=šmi a[šaš]i

101 -- ḪUR.SAGPentayaš pēdi=tti ēš

102 -- GAL-in=za lē karapši

103 -- ḪUR.SAGḪargaš pēti=ddi ēš

104 -- ḪUR.SAGDudḫaliyaš pēdi=tti ēš

105 -- [GA]LḪI.A=za lē karapši

§23

106 -- ḪUR.S[AGŠi]ddueni ḪUR.SAGPiškurunuwa pēdi=šmi ē[šten]

107 -- GALḪI.A=za lē karapteni

§24

108 -- […]x LUGAL-uš ḪUR.SAG-i paizzi

109 -- GAL-in DUTU-un karapzi

110 -- [nu ḫū]kkiškizzi

111 -- ḫulteškizzi

112 -- [LUGAL-i=wa=k]an kāš kāš ištarningain EGIR-pa dāš

§25

113 -- [šāuw]ar EGIR-pa dāš

114 -- kattawātar EGIR-pa dāš

115 -- [naḫša]rattan EGIR-pa dāš

116 -- weritiman [EGI]R-pa dāš

117 -- kardiyaš GIG-an EGIR-pa dāš

118 -- GIG-an=ši=kan dāš

119 -- miḫuntatar=še=kan dāš

120 -- mayatatar=ma=šši EGIR-pa paiš

121 -- ḫullatar=ma=šši EGIR-pa pāiš

§26

122 -- eḫu zik TI8MUŠEN īt

123 -- 1-EN=mu=kan uttar arḫa merta

124 -- uktūriyaš īt

125 -- nu kinūpi uda

§27

126 -- kinupi=ma=ššan anda ŠA UR.MAḪ šiešai paršanaš UZUšišai šumumaḫ

127 -- n=at ḫarak

§28

128 -- n=at tarup

129 -- n=at 1-EN iya

130 -- n=at LÚ-aš ŠÀ-ši pēda

131 -- nu LUGAL-waš ZI-aš kardi=šši=ya taruptaru

§29

132 -- nu DUTU-uš DIM-ašš=a LUGAL-waš takšuli=šit dandu

133 -- nu uttar=šamet 1-EN kišaru

134 -- nu DUTU-uš DU-ašš=a udnē EGIR-pa LUGAL-i maniaḫḫir

135 -- MUḪI.A-a=šši EGIR-pa newaḫḫir

136 -- naḫšaratta[n] newaḫḫir

§30

137 -- ALAM-i=šši AN.NA-aš iēr

138 -- SAG.DU-ZU AN.BAR-aš iēr

139 -- šākuwaš=ši TI8MUŠEN-aš iēr

140 -- ZU9ḪI.A=ma=šši UR.MAḪ-aš iēr

§31

141 -- DTelibinuš uiddu

142 -- xxx[ … ] ḫāšu

143 -- nu GEŠTIN-an udau 9 šaptamenzu

144 -- nu ḪUR.SAG-i pēdau

145 -- DINGIRMEŠ ḫūmanteš ḪUR.SAG-i taruppanteš

146 -- nu=za=kan LUGAL-un duškeškanzi

147 -- n=an=z(a)=an=kan palkuiyanta

§32

148 -- DUTU=uš=za DIM-ašš=a LUGAL-un EGIR-pa kappūēr

149 -- n=an dān mayandaḫḫir

150 -- MU.KAMḪI.A=šaš=šan kutriš UL iēr

§33

151 -- nu šeppit euwann=a šuḫḫair

152 -- nu pakkuškanzi

153 -- kuiš LUGAL-i idālu šanḫazzi

154 -- apūnn=a DINGIRMEŠ idalūe peššeyandu

155 -- nu apunn=a pakkuškandu

§34

156 -- mān kuwapi kuwapi URU-ri É.GAL-LAM wetezzi

157 -- nu kuiš LÚNAGAR IṢṢI ḪUR.SAG GIŠinnaššaš karšūwanzi paizzi

158 -- nu IŠTU É.GAL-LIM 1 GU4.MAḪ 3 UDUḪI.A 3 DUG GEŠTIN 1 DUG marnuwan 10 NINDAwageššar 20 NINDA.ZU9 50 NINDA. ÉRINMEŠ=ya dāi

§35

159 -- mān LÚNAGAR GIŠiškiššanaš GIŠišparuzzi karšūwanzi paizzi

160 -- nu=za IŠTU É.GAL-LIM 20 NINDA.ZU9 50 NINDA.ÉRINMEŠ-ya dāi

§36

161 -- mān=kan šamanuš=ma išḫuwanzi

162 -- nu IŠTU É.GAL-LIM 1 GU4.MAḪ 1 GU4.ÁB 10 UDUḪI.A=ya danzi

163 -- nu=kan GU4.MAḪ ANA DU 1 GU4.ÁB=ma=kan ANA DUTU URUArinna šipantanzi

§37

164 -- UDUḪI.A=ma=kan kuinna kuedani ANA DINGIR-LIM šipandanzi

165 -- NINDAḪI.A=ma GEŠTIN=ya IŠTU É.GAL-LIM danzi

§38

166 -- mān=šan GIŠinnaššuš=ma ḫuittianzi

167 -- nu namma QĀTAMMA iyanzi

§39

168 -- mān=za=kan LÚ.MEŠKISAL.LUḪ ÉMEŠ GIBIL ḫaneššūwanzi appanzi

169 -- nu kī uddār memiyanzi

170 -- GIŠDAG-iz=wa taraškizzi

171 -- mān=wa=za É-ir andurza ḫanešteni

172 -- nu=wa MU.KAMḪI.A GÍD.DA ḫanešteni āššu ḫaništeni

§40

173 -- mānn=at araḫza=ma ḫanešteni

174 -- nu naḫšaraddan ḫanešten

175 -- nu išḫaššarwātar ḫanešten

§41

176 -- IŠTU É.GAL-LIM=ma 3 UDU 3 DUG GEŠTIN 3 DUG marnuwan 10 NINDAwageššar 20 NINDA.ZU9 50 NINDA.ÉRINMEŠ=ya danzi

§42

177 -- mān LÚ.MEŠKISAL.LUḪ=ma ÉMEŠ GIBIL-TIM=kan GUNNI-an GIBIL-an tianzi

178 -- nu kī uddār memi[y]anzi

§43

179 -- DINGIRMEŠ=wa GUNNI dāir

180 -- nu=war=an [NA₄]kunnanit ḫūraīr

181 -- n=an AN.BAR-it šan[ḫ]ir

182 -- n=uš=šan DINGIRMEŠ ešantari

183 -- nu=z(a=š)an É-aš BĒLUMEŠ-TIM LUGAL-uš MUNUS.LUGAL-š=a DAMMEŠ paḫḫuwaršeš ešantari

184 -- n=at=za=kan šāšaš maḫḫan kunkiškantari

§44

185 -- nu=z(a=š)an DUMU.MUNUSMEŠ É-TIM ešantari

186 -- nu=z(a=š)an GIŠtuḫḫana kittari

187 -- kattan=ma=šmaš šaḫuwan kittari

188 -- nu memal kitta

189 -- GUNNI tezzi

190 -- apāt=wa=mu=kan āššu

§45

191 -- nu=z(a=š)an pappanegneš ešantari

192 -- n=at=za TI8MUŠEN.ḪI.A GIM?-an x duškantari

193 -- GUNNI=ma tezzi

194 -- ap[āt=wa=mu] ā[š]šu

§46

195 -- LUGAL-ušš=a MUNUS.LUGAL-ašš=a DINGIRMEŠ-aš x[ … ] ašandu

196 -- LUGAL-aš DUMUMEŠ [ … ]

§47

197 -- n=at=šan ḫaššī ḫaliḫliyandāri

198 -- nu DUMU.NÍTAMEŠ DUMU.MUNUSMEŠ ḫaššeš ḫanzaššeš makkeššandu

199 -- GUNNI=ma tezzi

200 -- apat=wa=mu āššu

§48

201 -- IŠTU É.GAL-LIM=ma kī danzi

202 -- 1 wakšur Ì.ŠAḪ 1 wakšur LÀL 1 GA.KIN.AG 1 EMṢU SÍG BABBAR SÍG GE6 1 ŠĀDU BAPPIR 1 ŠĀDU DIM4 GIŠšamama GIŠGEŠTIN ḪÁD.DU.A GIŠlēti GIŠšuwaitar KUŠ.GU4 MUN mašiwan=šan ḫaššī anda ḫandaittari

§49

203 -- nu 10 walluš tianzi

204 -- nu kiššan memiyanzi

205 -- kī=wa wallēš maḫḫan arlipa artari

206 -- LUGAL-š=a uddār QĀTAMMA arlipa artaru

§50

207 -- nu GIŠGEŠTIN-aš GIŠmaḫlan tianzi

208 -- KI.MIN

209 -- GIŠGEŠTIN=wa maḫḫan katta šūrkuš šarā=ma=wa GIŠmaḫluš šīyaizzi

210 -- LUGAL-š=a MUNUS.LUGAL-š=a katta šurkuš katta=ma GIŠmaḫluš šīyandu

§51

211 -- nu GIŠeyan tiyanzi

212 -- KI.MIN

213 -- GIŠeyan maḫḫan uktūri iyatniyan

214 -- nu ḫurpaštanuš arḫa UL išḫuwai

215 -- LUGAL-š=a MUNUS.LUGAL-š=a QĀTAMMA iyatnianteš ašandu

216 -- uddārr=a=šmaš QĀTAMMA uktūri ēšdu

§52

217 -- nu GIŠartartin GIŠmaršiqqann=a tianzi

218 -- nu kiššan memiyanzi

219 -- kē=wa maḫḫan aršeškanzi

220 -- nu LUGAL-un MUNUS.LUGAL-unn=a ḫaššeš ḫanzaššeš anda QĀTAMMA aršiyandu

§53

221 -- kē ḫūman ŠAPAL GUNNI zikkanzi

§54

222 -- IŠTU É.GAL-LIM=ma 3 UDUḪI.A 1 ME NINDAḪI.A 3 DUG GEŠTIN 5 DUG marnuwan danzi

223 -- nu GUNNI-i šipantanzi

§55

224 -- ŠU mPikku PĀNI mAnuwanza IŠṬUR